هــلا بكـن على { مـائــدة إفطــارى }

الساعية إلى الجنة · 10 رمضان, 1430 هـ, 12 : 01 م

السـلامُ عليكُـنَّ و رَحمـةُ اللهِ و بَركاتُـه ،،

لم أحضر الصور .. لأنى لا أملك جوال بكاميرا ..
فاعذرننى .

{ الأرز بالشعرية }

نحمر الشعرية ، و نحط عليها الميه ، و لما تغلى نحط الملح و الأرز ، و نتركه لحد ما يستوى .

{ البطاطس بالدمعه }

نقطع البصل ، و نقشر البطاطس و نقطعها و نغسلها و نحطها عليه ، و نضرب الطماطم فى الخلاط و نحطها عليهم ، و بعدين نسيبهم على النار لحد ما تستوى البطاطس ، و نضيف الملح و البهارات ، و نسيبها ثوانى ، و بعدين نطفى عليها .

{ الفِـراخ }

نضع الماء على النار و نسيبه يغلى ، ثم نضيف الفرخه و هى محشيه أو نقطعها ، و نضع معها بصلة مقشره ، و ثوم مفروم ، و ملح و بهارات ، و نسيبها لحد ما تستوى ، و بعدين نحمرها .

{ الجلاش باللحمة المفرومة }

نجيب صينية و ندهنها بالسمن ، و ناخد نُص الجُلاش و نبدأ نضعه بالصينية طبقتين طبقتين ، و ندهن أطراف كل طبقتين بالسمن ، لحد ما نحطهم كلهم ، و بعدين نضع العَصَّاج (اللحمة المفرومة بالبصل بعد ما نعملها ع النار) ، و بعدين نحط النص التانى من الجلاش ، برده طبقتين طبقتين ، و كل طبقتين ندهن أطرافهم بالسمن ، لأن الجلاش بينشف بسرعة .. و بعدين ندخله الفرن لحد ما يستوى ، و نضيف كوب لبن عليه ملح و بهارات أو كوب شوربه و ممكن نكسر عليه بيضه عشان الجلاش يمسك فى بعضه ، و نسيبه شويه فى الفرن لحد ما ينشف و بعدين نشيله .

{ باذنجان مخلل ( و البعض يسميه "مسقعه" ) }

نجيب باذنجان رفيع و نشقه بالسكين بالطول ، و نسلقه أو نقليه ، و بعدين نحمر البصل أو نسيبه من غير تحمير و نضع عليه الثوم و الطماطم المقطعه و نخليه يستوى و ممكن نضيف ميه ،، و بعد ما يستوى نحط الملح و البهارات .. بعدين نشيله من النار ، و نبدأ نحشى الباذنجان به .

{ السلطة }

طماطم + خيار + جزر + جرجير + خس + أى حاجه
نقطعهم مع بعضهم و نحط الملح و البهارات و الليمون .

{ عصير الليمون }

4 ملاعق صغيرة سكر + ليمونة + ماء
و نعملهم فى الكوب .

الحلويات [ جُـلاش ]

ندهن صينية بالسمن ، و ناخد كذا طبقة من الجلاش و نحشيها بالمكسرات ، و نلفها ، و نقطعها بالحجم اللى نحبه ، و نرصها فى الصينية و ندهنها بالسمن .. و ممكن نضع نص الجلاش برده طبقتين طبقتين و ندهن أطرافهم بالسمن ، و بعدين المكسرات ، و نضيف باقى الجلاش و ندهن كل طبقتين بالسمن .. و بعدين ندخل الصينية الفرن لحد ما تستوى و نضع الشَربات .

و بالهنا و الشِفا ،،